[Warning: Sensitibo ang kaundan sang balita bangud nagadetalye ini sang krimen kag pagpatay]
Ginbawian gid sang kabuhi ang isa ka 21-anyos nga graduating nursing student matapos ginkuga sang iya pakaduwa sa San Antonio, Nueva Ecija.
Ang biktima amo si Ann Pauline Fajardo, estudyante sang Wesleyan University-Philippines (WUP) sa Cabanatuan City kag residente sang Brgy. Sto. Cristo, San Antonio, Nueva Ecija.
Ang suspek naman nagaedad sang 27-anyos, isa ka negosyante.
Base sa imbestigasyon, naghulam sang P5,000 ang suspek apang wala ini ginpautang sang biktima tubtob nagbaisay ang mga ini.
Didto na ginsakit kag ginkuga sang suspek ang biktima tubtob nga napatay.
Sunod nga ginhigtan sang suspek sang habol ang liog sang biktima kag ginpakabit agud pagwaon nga nagpanginmatay ini.
Madasig nga nalagyo ang suspek dala ang cellphone sang biktima.
Sang nasapwan ang lawas, gindumdom sang otoridad nga nagpanginmatay gid man ini apang nakit-an ang mga lagob rason nga ginpaidalom sa autopsy kag nakumpirma nga ginpatay ini.
Natultulan ang suspek matapos nga na-detect ang nahamtangan sang cellphone.
Nag-ako man ang suspek sa nahimo nga krimen.
Pasakaan sang nagakaigo nga kaso ang suspek nga yara na sa kustodiya sang kapulisan.
