ANTIQUE – Nagdepensa ang punong barangay sang Calala, Hamtic, Antique nga amo ang ginareklamo sang isa ka pamilya nga nagbutang sang yellow caution tape sa gate sang isa ka balay sang medical frontliner nga bag-o lang ginpaidalom sa swab test.
Sa exclusive interview sang Bombo Radyo kay Punong Barangay Silvestre Tolentino, iya gin-ako nga siya kag isa ka barangay kagawad ang nagbutang sang caution tape ‘bilang proteksyon sa iban nga mga pumuluyo’.
Ginpahayag ni Tolentino nga antes ang pagbutang sang caution tape, wala sang hinalung-ong ang mga barangay officials nga may gin-quarantine ukon gin-swab test sa amo nga balay bangud wala man sila nag-inform sa mga opisyal.
“Wala gid kami ginpahibalo. Amo ina ang problema, ginquarantine siya sa amon barrio, pero waay man kami paman-i,” pahayag ni Tolentino.
Kahapon sang hapon lang sang napahibalo sang katapo sang Barangay Health Emergency Response Team si Tolentino pagkatapos nga may ginpadul-ong nga pagkaon para sa naka-quarantine.
Ginapahayag nga staff sang Angel Salazar Memorial Hospital ang gin-swab test apang ang problema suno sa punong barangay, ‘may kabulig kag driver nga naga-gwa sulod sa amo nga balay’. Magluwas sa kabulig kag driver, ginapahayag nga may utod pa kag iloy ang amo nga medical staff nga kaupod man nila sa ila nga balay. “Bilang kapitan, depensahan ko man ang mga pumuluyo ko,” dugang pa ni Tolentino ilabi na bangud suno sa iya, nahamtang pa sa higad sang provincial road ang balay. “Depensa man lang ‘to, indi man nga ginduraan gid ka privacy ah. Ginapamaan lang sa mga tawo nga diyan may naka-quarantine.”
Wala nakahibalo si Tolentino kun san-o nagpa-swab test ang amo nga medical staff apang wala pa subong nakaabot ang resulta.
Sang una suno sa iya, ginabaton man ang home quarantine sa ila nga barangay [kun pasado sa requirements sang DOH para sa home quarantine measure] apang ini ang labing-una nga bes nga wala napahibalo sa ila nga may gin-quarantine nga nagmato-mato lang.
Ginkakas naman subong ang yellow caution tape matapos nga ginpadulungan sang pulis.
Nagahingyo si Tolentino sa mga pumuluyo nga hangpon ang sitwasyon bangud bilang barangay official suno sa iya, luyag niya nga mapabilin nga COVID-19 free ang Barangay Calala. #
