Ginbasol ni Justice Secretary Jesus Crispin ‘Boying’ Remulla ang mga abogado ni former senator Leila de Lima nga wala nag-raise sang habeas corpus kag sa iya anum ka tuig nga detention bilang ground sa bail application apisar una naman nga nagpahayag ang Department of Justice (DOJ) nga indi ini magpamatok sa amo nga tikang.
Suno sa tiglikom, gusto gid sang mga abogado ni de Lima nga magpasikat kag gindumdom nila nga masarangan nila ang kaso.
“Sinabi ko na dati ‘yan. We would not have objected if there is a petition for bail based on humanitarian grounds because after all, six years na siya, anim na taon na syang naghihintay. Sana yun na lang sinulat nila at nag-intay muna yung kanyang abogado. Sinabi na namin na di naman papalagan kung ganun ang naging dahilan… Pero gusto nilang magpasikat ng ganun, o magparinig o magpahiwatig na ang tingin nila ay kayang-kaya nila ang kaso. ‘Yun ang kanilang desisyon e,” suno kay Remullla.
Pahayag ini sang justice secretary matapos ginbasura sang korte sa Muntinlupa ang bail petition nga gin-file ni de Lima.
Ini nga bail petition ang may kaangtanan sa drug case nga pending sa Muntinlupa Regional Trial Court Branch 256 kun sa diin involved ang mga preso sa New Bilibid Prison nga nag-akusar kay de Lima nga amo ang nagapadalagan sang illegal drug trade sa sulod sang Bilibid.
Ini nga kaso-kriminal amo ang ikatatlo kag nagaisahanon nga nabilin nga kaso batok kay de Lima nga isa man ka former justice secretary.
Matandaan nga gin-panginwala ni De Lima ang amo nga claims kag gin-kwestyon ang kredibilidad sang mga testigo nga ginpapungko sang gobyerno.
Base naman sa 35-page order ni Muntinlupa RTC 256 Judge Romeo Buenaventura, ginpahayag nga base sa maid-id nga review sa ebidensya sang prosecution, kumbinsido ang korte nga mabaskog ang ebidensya batok sa akusado.
Dugang naman ni Justice Secretary Remulla, dapat nga respetuhon ang korte kag ang desisyon sini. #
