ILOILO CITY- Naka-consolidate na ang kalabanan sa mga public utility vehicles sa syudad kag probinsya sang Iloilo base sa latest nga data sang Land Transportation Franchising and Regulatory Board.
Sa probinsya sang Iloilo, 97 percent na ang consolidated ukon 1,911 sa 1,978 nga mga salakyan.
Sa syudad naman, 75% ang na-rekord nga na-consolidate ukon 1,692 sa 2,266.
Sa interview sang Bombo Radyo kay Atty. Salvador Altura, legal counsel sang talatapan, iya ginpahayag nga kun basehan ang memorandum circular sang Land Transportation Franchising and Regulatory Board, ang mga public utility vehicles nga wala naka-file para sa consolidation antes ang Disyembre 31, 2023 ang nakabig na nga revoked epektibo sang Enero 1, 2024.
May mga traditional units lamang nga ginpahanugutan nga magbyahe gihapon sa ila nga kinaandan nga ruta tubtub sa katapusan subong nga bulan bangud ginhatagan sang konsiderasyon ang mga areas nga wala sang consolidation.
