Gin-anunsyo sang Hamas nga ginbaton sini ang Gaza ceasefire proposal halin sa Egypt kag Qatar.
Sa statement sang Islamist faction, ginsiling nga ang ila chief nga si Ismail Haniyeh ang nakapahibalo na sa prime minister sang Qatar kag intelligence chief sang Egypt kaangot sa ila desisyon nga batunon ang ginatanyag sang duha ka pungsod.
Wala pa sang detalye kun ano ang kaundan sang nasambit nga agreement apang may Israeli official nga nagpahayag nga ang proposal nga ginpasugtan sang Hamas ang nagaunod sang lain nga framework ipaanggid sa nauna nga nakasugtan kaupod sa mediators.
May nagaguwa nga inisyal nga reports nga magluwas sa ceasefire, nalakip sa proposal ang reconstruction sang Gaza Strip, ang pagpabalik sa tanan nga mga pumuluyo nga nagtal-as bangud sa gyera, kag ang paghilway sa Palestinian prisoners.
Ini nga statement sang Hamas ang nagguwa kasunod sang negosasyon sa Cairo kun sa diin nalakip ang Egyptian kag Qatari delegations kag si Central Intelligence Agency director William Burns. Sunod ini nga nagbyahe pakadto sa Doha agud magkonsulta kay Qatari Prime Minister Mohammed Al Thani kag ginalauman man nga magabisita sa Israel subong nga semana.
Si US President Joe Biden ang nag-istorya man kay Israeli Prime Minister Benjamin Netanyahu sa sulod sang tunga sa oras kahapon kag ginalauman man nga magpatigayon sang pribado nga pagsinapol sa White House kaupod kay King Abdullah sang Jordan.#
Photo: REUTERS/Hatem Khaled
