Ginkaalarma sang Commission on Human Rights (CHR) ang ginpahayag natabo nga hazing incident sa Quezon City kun sa diin isa ka menor de edad ang involved.
Ginkumpirma sang ahensya nga nag-umpisa na ang imbestigasyon agud matumod ang paglapas sa Anti-Hazing Law kag sa Anti-Child Abuse Law.
Sandig sa report, ang nagpatigayon sang hazing amo ang fraternity president sang Magic 5 kaupod sang myembro sang Alpha Kappa Rho International Fraternity kag ang presidente sang SBP fraternity sa Quezon City.
Sa report sang Quezon City Police District, nalipong ang biktima bangud sa indi masarangan nga kasakit kag physical injuries.
Naospital gid ang bata bangud sa amo nga hitabo.
Sandig sa dugang nga impormasyon, myembro ang bata sang Scout Royale Brotherhood Nu-Theta Chapter Fraternity kag ginsaylo sa Magic 5.
Nagpanawagan liwat ang ahensya sa tanan nga concerned agencies, local governments, security sector, kag mga eskwelahan nga magtutok sa konkreto nga mga tikang agud malikawan ang hazing bangud ginalapas sini ang kinamatarong sang tanan sa safety kag security.
