ILOILO CITY – Nagpanindugan ang House Committee on Ethics nga wala gindali-an ang rekomendasyon nga i-suspend si Negros Oriental 3rd district Rep. Arnolfo “Arnie” Teves Jr. sa sulod sang duha ka bulan.
Suno kay Nueva Ecija 3rd district Rep. Ria Vergara, senior vice chairperson sang komitiba, mangin si House Speaker Martin Romualdez na ang nagtinguha nga enganyuhon si Teves nga magbalik sa Pilipinas antes nagsugod ang committee hearing.
Nagsugod sang motu proprio investigation ang komitiba batuk kay Teves sang Marso 15 matapos nga ginkonsiderar nga absent without official leave ang mamamlidha.
Una na nga ginpahayag sang Kamara nga ang ginhatag nga travel clearance ang naga-cover lamang sang Pebrero 28 tubtob Marso 9.
Si Teves ang gin-angut sa kamatayon ni Negros Oriental Governor Roel Degamo kag makapila ka beses nga nagpamalibad nga magbalik sa pungsod bangud sa kahadluk sa iya kabuhi.
Ginlaslasan ni Atty. Ferdinand Topacio ang ethics panel bangud sa ginpahayag nga pagdali sang rekomendasyon sini batuk sa iya kliyente nga si Teves kag gin-suspend ini nga wala man lamang ginpamatian ang iya bahin.
Apang suno kay Vergara, naka-depende na sa panel ang pag-suspend ukon pag-ilis sang pagsulundan sini.
Nahibaluan nga sang Marso 22 sang ginbotohan sang House plenaryang pag-suspend kay Teves bangud sa “disorderly behavior”.
