ILOILO – Naglab-ot sa 28 ang kaso sang rabies sa Western Visayas.
Sa interview sang Bombo Radyo kay Dr. Marie Jocelyn Te, Rabies Prevention and Control Program Medical Coordinator sang Center for Health Development, Department of Health 6, iya ginpahayag nga ang 28 ka kaso ang santo sa data as of December 31, 2019 sa diin nagapangaduha ang rehiyon sa may pinakamadamu nga kaso sang rabies sa pungsod.
Kun pahat-pahaton suno kay Dr. Te, ang Negros Occidental ang may 10 ka kaso, Capiz kag Iloilo nga may 5, Aklan nga may 4, Iloilo City nga may 2, Antique kag Bacolod City nga may tag 1 apang wala pa sang data gikan sa probinsya sang Guimaras.
Ginpahayag ni Dr. Te nga bastante ang Human vaccine apang kulang naman ang bakuna para sa mga sapat rason nga kinahanglan gid mangin responsable ang pet owners.
Isa man sa problema sa rehiyon suno sa natungdan amo ang nagadamu nga layaw nga ido nga wala nabakunahan kag nangin source sang rabies.
Kun makagat sang ido ukon kuring, indi na kinahanglan nga magkadto sa tandok kag sa baylo, gilayon nga magpadulong sa animal bite treatment center para sa nagakaigo nga pagbulong.
Sa subong, ginpahayag ni Dr. Te nga wala pa sang bulong para sa rabies.
