ILOILO – May yara pa sang 105 ka High Value Target sa Western Visayas nga yara sa monitoring sang Police Regional Office 6.
Sa interview sang Bombo Radyo kay Police Lt. Col. Joem Malong, tagpamaba sang Police Regional Office 6, iya ginpahayag nga santo sa data humalin sang ginpatuman ang Oplan Double Barrel sang 2017 tubtub 2019, naglab-ot sa 1,632 ang High Value Target sa rehiyon.
Suno kay Malong, 922 ang nadakpan, 100 ang nangin dulaan, 7 ang napatay bangud sa balati-an, 30 ang napatay sa police operations, 44 ang nagsungka, 1 ang kumpirmado nga yara sa luwas sang pungsod kag 105 ang yara sa monitoring.
Ginpahayag ni Malong nga duha lamang ka posibilidad ang mahimo matabo kag ini amo nga mahimo nga magnubo ukon magtaas ang numero sang High Value Target nga yara sa monitoring.
Ang mga nagsungka suno sa natungdan ang ginapanugyanan nga magpaidalom sa rehabilitation samtang ang iban naman sa mga High Valkue Target ang nag-apply sang plea bargaining agreement.
Sa bahin naman sang mga pulis nga naulamid sa illegal drugs, ginpahayag ni Malong nga padayon ang monitoring.
Ginpahayag ni Malong nga pagahatagan sang due process ang mga pulis kag kun mapamatud-an nga inosente, ipaidalom sila sa adjudication process.
Ginpasalig man sang natungdan nga mismo ang Philippine National Police ang magapanguna sa adjudication process agud nga matinlu-an ang pangalan sang mga pulis nga nauna nga ginhingadlan nga naangot sa illegal drugs.
