Magaduso man sang petisyon ang isa pa ka transport group sa syudad sang Iloilo agud nga pataasan ang plete sang mga pasahero sa jeep.
Sa interview sang Bombo Radyo kay Nick Dalisay, presidente sang Iloilo City Alliance of Drivers Association (ICADA), iya ginpahayag nga P1 lang ila luyag nga saka sa plete agud nga indi man matam-an ang mga commuters.
Kun mapaboran ang petisyon, halin sa P9, mahimo nga P10 ang minimum fare sa syudad.
Kasunod ini sang siyam na ka semana nga asud-asud nga pagsaka sa presyo sang gatong sa Pilipinas nga ginpalala pa sang away sa tunga sang Ukraine kag Russia.
Suno kay Dalisay, magasapol pa sila sang asosasyon agud desisyunan ini nga petisyon kag kun paano ini i-balay.
Magluwas kanday Dalisay, una na nga nagpahayag ang Iloilo City Loop Alliance of Jeepney Operators and Drivers Association (ICLAJODA) nga ginaduso man nila ang P2.50 nga saka sa minimum fare.
Ang Land Transportation Franchising and Regulatory Board (LTFRB) naman ang natalana nga magpatigayon sang hearing sa Marso 8 agud nga pamatian ang petisyon sang mga driver sang public utility jeepneys.
