Nagduso na sang application ang chief prosecutor sang International Criminal Court (ICC) para madagdagan sang arrest warrants si Israeli Prime Minister Benjamin Netanyahu kag ang lider sang Hamas sa Gaza nga si Yahya Sinwar bangud sa war crimes.
Suno kay prosecutor Karim Khan, may yara sang malig-on nga mga rason nga pareho nga responsable ang duha ka mga lider sa war crimes kag crimes against humanity halin sang gin-atake sang Hamas ang Israel sang Oktubre 7, 2023 tubtub nga nagpadayon ang gyera bangud sa pagtimalos naman sang Israel sa Gaza.
Nag-apply man ini para sa warrant of arrest kanday Israeli defence minister Yoav Gallant kag political leader sang Hamas nga si Ismail Haniyeh amo man ang military chief sang militante nga grupo nga si Mohammed Deif.
Nahibaluan nga yara lang sa Gaza sanday Mohammed Deif kag Yahya Sinwar samtang si Ismail Haniyeh naman ang naka-base sa Qatar.
Lakip sa ginaalegar mga krimen nga nahimo sang Hamas leaders suno kay Khan amo ang extermination, murder, hostage taking, rape kag sexual violence, kag torture.
Yara na subong sa kamot sang korte ang pagdesisyon kun bastante bala ang mga ebidensya agud magpaguwa sang arrest warrants apang ginapatihan nga kinahanglan pa ang sinemana ukon binulan antes ini matabo.
Ang Israel kag ang Qatar ang lunsay indi myembro sang ICC, apang ang Palestinian territories ang nakasulod na bilang member state sang 2015. Pananglitan maka-isyu ang korte sang warrants, igatugyan naman sang ICC sa member countries ang pagpatuman sang pag-aresto.
