ILOILO CITY- Maga-deploy ang Iloilo City Police Office sang 122 police personnel bilang preparasyon sa selebrasyon sang Chinese New Year sa syudad.
Sa interview sang Bombo Radyo kay Police Colonel Joeresty Coronica, Director sang Iloilo City Police Office, iya ginpahayag nga magalawig ang deployment sang mga kapulisan sa nagkalain- lain nga mga area sa syudad tubtob sa Pebrero 11.
Suno kay Coronica, may yara nga iga-pahamtang nga police assistance desks kag screening sa mga areas kun sa diin patigayunon ang amo aktibidad kaangot sa selebrasyon.
Dugang pa ni Coronica, ang pagpang-deploy sang mga kapulisan ang mapasiguro nga hilway ang pumuluyo sa pagselebrar sa Chinese New Year.
May patigayunon man nga road closure sa Iloilo City Proper may kaangtanan sa selebrasyon sang Chinese Lunar New Year sa syudad.
Sa interview sang Bombo Radyo kay Ret. Police Colonel Uldarico Garbanzos, head sang Iloilo City Traffic Management Unit, iya ginpahayag nga magasugod subong nga adlaw ang pagpasirado sang dalan sa Filipino Chinese Friendship Arch nga sakop sang Iznart Street kag De Leon Street.
Suno kay Garbanzos , magasirado man ang porsyon sang dalan sa Plazoleta Gay pakadto sa dalan sang Ledesma, Valeria, Bonifacio Drive, JM basa kag Aldeguer.
Dugang pa Garbanzos, igapatukod naman bwas nga adlaw ang pila ka mga stages nga pagagamiton sa amo nga kahiwatan kag lauman sang mga motorista ang pagpugok sa dalagan sang trapiko.
May yara man sang blocking ang pila ka mga nagapasakop sa Chinese Cultural Show nga patigayunon sa downtown area.
