ILOILO – Nabaton na ni Pol Col Martin Defensor Jr. ang memorandum nga naga designar sa iya bilang Acting Chief sang Regional Staff sang Police Regional Office 6 matapos nga gin relieve na si Pol Col Marlon Tayaba bilang Chief sang Regional Staff.
Samtang magabulos naman sa posisyon ni Defensor si Pol Col Eric Galanagra Dampal nga magapungko bilang Acting City Director sang Iloilo City Police Office
Sa interview sang Bombo Radyo kay Pol Col Martin Defensor, iya ginpahayag nga madamo ang iya nangin accomplishment sa Iloilo City Police Office sa diin isa na diri amo ang nangin matawhay nga pagpatigayon sang Dinagyang Festival 2020 nga nangin posible bangud sa pagbantay sang bilog nga pwersa sang kapulisan.
Suno kay Defensor, sa iya pagpungko bilang City Director sang ICPO ila man nga na amat-amat pabag-o ang mga salawayon nga kapulisan paagi sa pila ka mga programa nga ila ginpatigayon.
Dugang sang natungdan, madamo pa siya kun tani sang plano para sa Iloilo City Police Office apang nagpasalig ang natungdan nga indi niya sa gihapon ini pagpabay-an.
Ginpasalamatan man ni Defensor ang tanan nga nagpakita sa iya sang suporta kag bulig.
Sa subong, indi pa makabiya si Defensor sa iya nga posisyon bangud wala pa sang order nagikan sa Police Regional Office 6 natuhoy sa iya nga bag-o nga designation kag dugang pa amo bangud wala pa naka abot ang mabulos sa iya nga si Pol Col Dampal.
