Magatukod sang team ang Traffic and Transportation Management Office (TTMO) agud nga makabulig sa pagpatigayon sang mga inspeksyon agud matapna ang isyu sang overloading sa mga modernized jeepneys sa Iloilo City.
Sa interview sang Bombo Radyo kay Retired Police Colonel Uldarico Garbanzos, head sang amo nga opisina, iya ginpahayag nga magasapol siya sa iya mga personnel agud ma-assign ang mga mahimo i-deploy kadungan sang inspeksyon nga patigayunon upod sa concerned agencies.
Suno kay Garbanzos, kabahin na ini sang agenda sa Local Public Transport Route Committee kun sa diin yara man ang presensya sang mga tiglawas sang Land Transportation Office (LTO) kag ang Land Transportation Franchising and Regulatory Board (LTFRB).
“Isa sa mga gin-agreehan nga may joint operation nga matabo —checking and inspection — para ma-prevent ang the same operation nga gina-obra sang mga driver kag PAO,” pahayag sini.
Dugang niya: “Kami willing gid kami mag-support kag mag-dedicate sang tawo para magbulig sa aton nga national agency.”
Pahayag pa ni Garbanzos, indi na bag-o nga isyu ang overloading ukon ang overcrowding sa modernized units kag nagakatabo ini mangin sa probinsya sang Iloilo.
Nakit-an sini nga ang pagpanghangkat sa pagtapna sa sini nga practice amo ang monitoring.
Ginbalikan ni Garbanzos ang “Anti-Sardinas” policy kun sa diin pareho nga may mandato ang LTO kag ang LTFRB sa pagdumili sa mga pampubliko nga salakyan nga nagakarga sang mga pasahero nga nagalalapaw na sa maximum nga seating capacities.
Sa lebel sang syudad suno pa kay Garbanzos, naga-apprehend sila sa mga unit sa mga terminal nga naga-operate nga lapaw sa ila nga registered seating capacity sa idalom sang Regulation Ordinance 2008-393.
“Maayo gid kun may operations, may joint operations, para tanan mangin aware kag mapakita sa tanan nga sinsero [ang operasyon],” dugang ni Garbanzos.
Una naman nga ginpahayag sang LTO 6 nga bilang kabahin sang mas ginpasangkad nga anti-overloading campaign, may random inspections nga himuon sa modern jeepneys sa bilog nga Western Visayas.
Ginmanduan man ni LTO-6 Regional Director Atty. Gaudioso P. Geduspan II ang tanan nga LTO District Offices sa Panay kag Guimaras kaupod sa law enforcement units nga aktibo nga ipatuman ang zero-tolerance crackdown batok sa nagaginutok nga mga pasahero sa sulod sang pampubliko nga salakyan.
“Violators will be penalized under existing transportation laws, including Republic Act 4136, or the Land Transportation and Traffic Code,” kabahin sang latest post sang LTO Region 6.#
(Photo: LTO Digital 6/FB
