Ginpaathag sang isa ka veterinarian nga may mga balatian ang tawo nga mahimo nga magsaylo sa hinuptanan nga ido.
Sa interview sang Bombo Radyo kay Dr. Tomas Forteza, Iloilo City veterinarian, iya ginpahayag nga base sa mga nagliligad nga mga pagtuon, lakip sa sini nga mga balatian ukon kondisyon amo ang leptospirosis, tuberculosis, kag hepatitis.
May mga parasitic diseases naman nga halin sa ido nga mahimo maglaton sa tawo ukon vice versa.
Apang pag-abot sa dengue, malaka pa ang kaso suno kay Forteza apang posible gihapon ini nga matabo bangud madasig mag-mutate ang virus nga dala sang lamok.
Sa Kalibo, Aklan, viral subong ang isa ka ido nga ginapatihan napatay bangud sa dengue.
Ginapahayag nga nagbatyag ang ido sang dengue-like symptoms kaangay sang pagdugo sang gums, hilanat, kag paghina sang resistensya.
Mas maayo suno kay Forteza kun mahibaluan gid kun ano nga diagnostic tool ang gingamit ukon kun ano nga tests ang ginhimo agud makalab-ot sa amo nga diagnosis.
