ILOILO CITY– All systems go na ang Iloilo Festivals Foundation Incorporated para sa Dinagyang festivities nga maga-umpisa na sa Enero 10, 2020 ,adlaw sang Biernes kadungan sang Opening salvo.
Sa interview sang Bombo Radyo kay Atty. Joebert Penaflorida,presidente sang Iloilo Festivals Foundation Incorporated, iya ginpahayag nga sa pihak sang mga paghangkat nga gin-atubang sang foundation, nagapasalamat sila bangud nga bug-os ang suporta sang mga stakeholders kag support groups ilabi na ang Syudad sang Iloilo pinaagi kay Mayor Jerry Treñas nga nagabulig para sa kadalag-an sang Dinagyang 2020.
Suno kay Atty. Penaflorida, nagapangayo man sila sang pagbuylog sang tanan nga mga Ilonggo para sa selebrasyon sang Dinagyang 2020 kag sa tanan nga aktibidad.
Ginapasalig man sang foundation nga apisar gamay ang tion nila agud maghanda sa Dinagyang, ginahimu nila ang tanan agud malab-ot ang expectations sang mga Ilonggo kag mga turista.
Samtang, gin-anunsyo man ni Peñaflorida nga sold -out na ang tickets para sa Dinagyang 360 degree.
Apang gin-athag niya nga na-democratize ukon nangin available sa tanan ang mga tickets kasunod sang isyu nga may mga scalpers nga nangumpra sang tickets kag ginbaligya sa mas mahal nga presyo.
Suno kay Peñaflorida,ang distribution sang tickets nga ginbaligya ang ginpaagi sa Meetings, Incentives, conferences/conventions, exhibitions/events ukon MICE alliance kag sa Association of Iloilo DOT accredited travel and tour operators (aidato) sa diin sa idalom sini, may yara sang 7 ka accredited hotels nga gin-tap bilang distributing arm.
