ILOILO CITY- Hugot nga ginpanginwala sang Iloilo City Government nga himuon nga SM Supermarkets ang duha ka mga mayor nga merkado sa Syudad sang Iloilo nga ipaidalom sa rehabilitation paagi sa Private-Public Partnership upod sa SM Prime Holdings Inc.
Sa interview sang Bombo Radyo kay Atty. Quintin Magsico, Asst. City Legal Officer kag Vice Chairman sang Public- Private Partnership (PPP) Selection Committee, iya ginpahayag nga regulated sa gihapon sang syudad ang operasyon sang Iloilo Terminal Market kag Iloilo Central Market.
Suno kay Atty. Magsico, maathag nga wala sa lease agreement nga i-turn over sang syudad sa SM ang nasambit nga mga merkado.
Dugang pa sang Asst. City Legal Officer nga indi man mag-compete ang SM,sa baylo, maga-complement ini sa mga enterprises nga magahatag sang serbisyo sa duha ka mga merkado sa tion nga makompleto ang rehabilitasyon.
