Anum ka Sabado kag anum ka Dominggo nga community service ang ginpapanaug nga penalidad sa 56-anyos nga empleyada sang Iloilo City Urban Poor Affairs Office (ICUPAO) nga naglapas sa health protocol sang nagpositibo siya sa COVID-19.
Sa interview sang Bombo Radyo kay Mr. Roy Firmeza, pinuno sang ICUPAO, iya ginpahayag nga sa duha ka dalagku nga relocation sites himuon ang community service.
Ini ang nahamtang sa River Plains Subdivision sa Lanit, Jaro kag Uswag Subdivision sa San Isidro, Jaro.
Matandaan nga una na nagdepensa ang amo nga empleyada nga indi niya hungod ang natabo nga pagpadulong sa esplanade kag pagpuli sa Calinog bisan nahibaluan niya nga infected siya sang virus.
Ginpahayag niya nga nakabatyag man siya sang diskriminasyon sa mismo adlaw nga nagpositibo siya sa virus kag wala man siya nakatinir sa ila balay sa Tacas, Jaro bangud indi luyag sang iya anak.
Suno sa empleyada, handa man siya nga atubangon kun ano ang sanction sa iya.
