Nagpasar na sang ordinansa ang Iloilo City Council agud nga mag-establisar sang zonal tricycle routes sa tagsa ka distrito sa syudad sang Iloilo.
Ang zoning ang makabulig agud nga ma-regulate ang byahe sang mga tricycle sa syudad kag malikawan ang colorum ukon illegal public transport.
Sandig sa Regulation Ordinance Number 2022-038, ang mga tricycle sa City Proper, Arevalo, Mandurriao, Jaro, Lapaz, kag Lapuz ang makabyahe lang sa sulod mismo sang ila nga zona ukon indi na pagpahanugutan nga makalapaw sa iban nga distrito kag indi man pagpahanugutan nga makabyahe sa national highway.
May yara naman sang interzonal tricycle route mga partikular nga nakaestablisar para sa Bakhaw Majatoda Route.
Ang mga tricycle diri nga lugar ang pwede makabyahe sa distrito sang Mandurriao magluwas sa national highways nga nagasakop pati sa portion sang Desamparados, El 98, Burgos Street, M. Jalandoni Street, Jaro Plaza, kag Fajardo Extensions sang Jaro.
Sa interview sang Bombo Radyo kay Iloilo City Councilor Atty. Rommel Duron, chairman sang Committee on Transportation sa konseho, iya ginpahayag nga kun may bag-o naman nga mag-apply para sa interzonal route, tun-an man ini sang konseho.
