ILOILO — Nagpaathag si Iloilo Governor Arthur Defensor Jr., nga wala sang ano man nga issue sa mga Ilonggo nga politiko nga may tuyo nga magpanumpa sa Partido Federal ng Pilipinas (PFP) nga Partido ni President Ferdinand Marcos Jr.
Ini kasunod sang pahayag ni Iloilo City Mayor Jerry Treñas nga handa ini magpasumpa sa iya anak nga si Raisa Treñas-Chu sa iban nga partido kun may issue.
Sa interview sang Bombo Radyo kay Defensor, iya ginpahayag nga on going sa gihapon sa iban nga lugar sang pungsod ang oath taking sa amo nga partido, samtang wala pa sang pinal nga schedule para sa Iloilo.
Suno kay Defensor, wala sang dapat nga dalian bangud ang ginasaku-an subong sang partido ang pagpakig-alyansa sa iban nga partido para sa 2025 elections.
Nahibaluan nga sang Abril 10 pa kuntani ang schedule sang pagpanumpa sang may mga tuyo nga magsulod sa partido apang makapila ka beses nga nakansela.
Nagpasalig naman ang gobernador nga subong nga bulan sang Mayo pagahiwaton ang oath-taking ceremony para sa bag-o nga myembro sang Partido Federal ng Pilipinas.
