ILOILO – Mas daku ang budget nga ginhatag sang probinsya sang Iloilo sa Dinagyang 2020.
Halin sa P500,000 sang nagligad nga tuig, ginpasakaan ini sa isa ka milyon ka pesos.
Sa interview sang Bombo Radyo kay Atty. Jobert Peñaflorida, presidente sang Iloilo Festival Foundation Incorporated (IFFI), iya ginpahayag nga ila gid ginakalipay ang bug-os nga suporta sang provincial government sa tanan nga mga aktibidad sang Dinayang 2020.
Dugang ni Penaflorida, ginapasalamatan nila indi lamang ang pinansyal kundi moral nga suporta ni Iloilo Governor Arthur Defensor Jr.
Sa pagsinapol ukon courtesy call nga ginhimo sang IFFI kay Defensor, naistoryahan man suno kay Peñaflorida ang pagrelocate sang judging area number 2, sa diin halinon ini sa Solis St sa baylo nga yara sa atubang sang daan nga provincial capitol.
Gindayaw ni Peñaflorida ang pagbaton man ni Defensor sang sini nga pagbag-o.
Samtang, ginpahayag naman ni Iloilo Governor Arthur Defensor Jr. nga kon siya ang pasugtan, dugangan pa gid niya ang fund nga mahimo makabulig sa Dinagyang 2020.
Halin sang una suno kay Defensor, nagin tradisyon na sang probinsya ang pagsuporta sa mga aktibidad sang nasambit nga tuigan nga okasyon.
Suno kay Defensor, ang isa ka milyon ang mabulig sang probinsya sa pinansyal bangud limitado lang ang pwede makuhaan sini sang budget.
May yara pa sang 1,721 ka barangay suno sa gobernador nga kinahanglan tatapon amo nga indi mahapos ang pagpagwa sang mas daku nga fund.
