ILOILO CITY- Alang-alang pa nga makadeklara ang Iloilo Provincial Government sang outbreak sa pertussis apisar nga nagapadayon ang pagsaka sang kaso sang balatian sa probinsya sang Iloilo.
Sa interview sang Bombo Radyo kay Dr. Maria Socorro Quiñon, pinunu sang Iloilo Provincial Health Office, iya ginpahayag nga may ginasunod nga criteria ang ahensya agud mapaidalum ang probinsya sa outbreak bangud sa pertussis.
Suno kay Quiñon, ginalantaw sa criteria nga kinahanglan sang tatlo pasaka ka mga banwa sa Iloilo Province ang makadeklara sang outbreak agud nga makadeklara man ang Iloilo Provincial Government.
Ginpahayag man ni Quiñon nga kapareho lang man ini sa mga kabanhawahanan nga nagakinahanglan sang tatlo pasaka ka mga barangay ang makadeklara sang outbreak agud makadeklara man ang isa ka munisipalidad sang outbreak sa pertussis.
Santo sa pinaka-ulihi nga data nga ginpagguwa sang ahensya, may 16 na ka mga kaso sang pertussis sa probinsya sa diin siyam diri ang laboratory confirmed.
Nahibaluan nga sa 16 ka mga kaso, tatlo diri ang napatay nga halin sa banwa sang Dumangas kag San Joaquin sa diin duha ang ginkumpirma nga napatay bangud sa pertussis kag ang isa ang nagbatyag sang sintomas sang nasambit nga balatian.
