ILOILO CITY- Ginasiguro sang Iloilo Provincial Engineer’s Office nga matapos na subong nga tuig ang Program, Projects and Activities nga natalana kuntani para sa Calendar Year 2022.
Sa interview sang Bombo Radyo kay Engr. Romeo Andig, head sang nasambit nga opisina, iya ginpahayag nga bangud sa kadamuon sang proyekto nga gin-uyatan nila sa idalom sang National Task Force to End Local Communist Armed Conflict, naatrasar man mismo ang ila nga mga proyekto gamit ang local funds.
Suno kay Andig, para sa Calendar Year 2022, kadam-an diri amo ang pagpasemento sang provincial roads apang naatrasar ang detailed engineering design tubtob sa procurement kag naumpisahan ang bidding process Oktubre 2021 na bangud gin-una sang opisina ang mga proyekto sa idalom sang National Task Force to End Local Communist Armed Conflict.
Apang pahayag niya, nagapadayon naman ang pagkaayo sang 18 ka mga road sections subong ukon 60% na nga mga proyekto nga nakalinya para sa Calendar Year 2022 ang nakumpleto na.
Sa pagkamatuod, may mga nakalinya naman nga mga proyekto para sa Calendar Year 2023 kag kadam-an naman sini amo ang repair kag rehabilitation sang provincial roads gamit ang 2023 national tax allocation ukon P424.5 million para sa 19 ka mga proyekto sa probinsya.
Nagalaum si Engr. Andig nga bangud nakabukas na sang bidding process subong nga Hulyo, matigayon naman nga ma-amat- amat ang mga proyekto nga natalana sa subong nga 2023.
