ILOILO CITY- Nagpanugyan ang Iloilo Provincial Health Office sa mga pamatan-on nga maghimo sang insakto nga desisyon sa Valentine’s Day.
Sa interview sang Bombo Radyo kay Dr. Maria Socorro Quiñon, head sang Provincial Health Office, iya ginpahayag nga dapat indi mag-engage sa premarital sex ang mga kabataan agud malikawan ang ‘unwanted pregnancy’.
Sa adlaw sang tagipusuon, nagakadapat suno sa iya nga mangibabaw ang respeto sa isa kag isa.
Suno kay Quinon, ang desisyon kag plano sa Valentine’s Day ang may yara sang lifelong effects.
Pahayag sang natungdan, nagakadapat nga mangin responsable ang mga kabataan kag panumdumon ang konsekwensya sang ila aktibidad kag paminsaron gid ang maayo nga buwas damlag.
Dugang pa niya, mahimo nga maka-engganyo sang risky sexual behavior ang Valentine celebration ilabi na sa mga pamatan-on nga ara sa romantic relationships.
Ginpresentar man sini nga base sa World Health Organization, ang mga adolescent mothers nga naga-edad 10–19 years old ang mahimo maka-eksperyensya sang mas mataas nga health complications kag systemic infections kun ipaanggid sa mga babaye nga naga-edad sang 20–24 years old.
Kag bangud kadungan sang Valentine’s day amo ang Ash Wednesday, nagpanugyan si Dr. Quiñon sa publiko nga dumilian ang pagkaon anay sang karne.
Nahibaluan nga ang ash Wednesday ang gina-obserba pinaagi sa fasting kag abstinence.
Ang fasting amo ang pagbuhin sang pagkaon nga ginakaon samtang ang abstinence ang nagatumod sa paglikaw sa pagkaon sang ano man nga sahi sang karne bilang senyales sang pag-penitensya.
