ILOILO CITY – Ginaplano sang Iloilo Provincial Government nga i-develop bilang laboratory testing facility ang Iloilo Provincial hospital nga mahimo patigayunan sang test para sa Coronavirus Disease 2019 kag iban pa nga balatian.
Sa interview sang Bombo Radyo kay Iloilo Governor Arthur Defensor Jr., iya ginpahayag nga madugay na nga ginaplano sang provincial government ang pagdevelop sang nasambit nga pasilidad.
Suno kay Defensor, magluwas sa COVID-19 mahimo man nga akomodaron sang laboratoryo ang pagtest para sa iban pa nga balatian.
Dugang sang natungdan, dugangan man ang mga pasilidad sang mga district hospitals sa probinsya lakip man ang bed capacity agud maka akomodar sang mas madamo nga pasyente.
Santo sa pahayag sang gobernador, ini man ang kabahin sang pagpanghanda sang provincial government sa tig-ululan sa diin masami nga nagaduging ang kaso sang Dengue Hemmorhagic Fever.
Samtang, magapadayon naman ang pagpatigayon sang Limpyo Iloilo ilabi pa subong nga nagahilapit na ang tig-ululan sa diin posible nga magsaka ang kaso sang Dengue Hemmorhagic Fever.
Suno kay Defensor, sa baylo nga Limpyo Iloilo pagatawgon na ini nga ‘Limpyo ECQ’ bangud nakapaidalom pa subong ang probinsya sang Iloilo sa Enhanced Community Quarantine.
Nagpanugyan ang gobernador sa mga pumuluyo nga gamiton ang subong ang tion sa diin yara lang sa balay ang tanan agud makapanglimpyo sang aton ugsaran agud man malikawan ang pagsaka sang kaso sang dengue.
