ILOILO CITY- Nagaapelar ang Iloilo Provincial Veterinary Office sa mga Local Government Units nga mag-hire sang barangay vaccinators may kaangtanan sa mass dog vaccination kontra sa Rabies.
Ang mass vaccination nagsugod sang Enero 1 kag magalawig sa Abril 30 kag may katuyuan nga malab-ot ang 70% nga vaccinaton coverage sa populasyon sang mga ido sa kada banwa.
Sa interview sang Bombo Radyo kay Dr. Darel Tabuada, Provincial Veterinarian, iya ginpahayag nga bastante ang supply sang bakuna sa kada banwa.
Apang suno kay Tabuada, isa sa mga rason kun ngaa may mga banwa nga wala nakalab-ot sa 70% nga target amo ang problema sa implementasyon sang vaccination program sa barangay level bangud wala sang hired barangay vaccinator.
Pahayag niya, nagapatigayon man sang vaccination ang Municipal Agriculture’s Office apang bangud nga kulang man sila sa staff, indi nila maarapalan ang pagpangbakuna sa mga ido.
Base naman sa data, ang mga banwa nga nakalab-ot sa 70% nga target sang mass dog vaccinationsang 2023 amo ang Concepcion, Oton, Leganes, Anilao, Ajuy, Pavia, Dingle, Banate, Sta. Barbara,kag Dumangas samtang ang wala naman nakalab-ot sa target amo ang San Rafael, Pototan, Bingawan,Janiuay, Zarraga, Tigbauan, Igbaras, kag Passi City.
