CEBU CITY – Nagalaum ang mga strandees sa Cebu City nga makabaton man sang bulig nagikan sa Overseas Workers Welfare Administration (OWWA) agud makapauli na sila sa ila tagsa ka panimalay subong nga ginasuprer ang coronavirus disease 2019 (COVID-19) crisis.
Sa interview sang Bombo Radyo kay Ian Mayo, isa sa mga strandees sa nasambit nga syudad, iya ginpahayag nga Marso 20 sang nagpauli siya nagikan sa Dubai, kag nadesisyunan nga sa Cebu magdiretso bangud madamo na sang Overseas Filipino Workers (OFWs) sa Metro Manila.
Apang bangud ginpatuman ang lockdown kag suspensyon sang byahe, napilitan ang natungdan nga magtinir sa amo nga lugar kag magbayad sang P400 sa gina-rentahan nga apartment kada adlaw.
Suno kay Mayo, wala sang food assistance nga ginhatag ang OWWA — rason nga nagakaubos na ang iya budget nga para kuntani sa iya pamilya.
Ang masami nga sabat sang pamunuan suno sa natungdan amo nga ‘maghulat lang sila’.
Dugang pa ni Mayo, wala man sila napaidalom sa polymerase chain reaction (PCR) test nga amo kuntani ang isa sa mga requirements agud makaproseso sila sa pagbalik sa Iloilo.
Dismayado man si Mayo nga sang damlag lang, daw kaangay nga ginpasa-pasa sila sang nasambit nga pamunuan sa diin gin-abisuhan sila nga mga strandees nga magpadulong sa barangay agud makapalista para sa PCR test.
Nagpanginwala man ang barangay nga ila obligasyon ang paglista kag pagpa-schedule sa COVID-19 testing.
Pahayag sang natungdan, handa man sila nga magsunod sa protocol kun ginahatagan lang sila sang insakto nga instruksiyon.
Nahibaluan nga santo sa record sang Central Visayas Health Department (DOH-7), ang bug-os nga isla sang Cebu ang may yara na sang 1,784 ka kaso sang COVID-19.
