GUIMARAS – Palaligban para sa isa ka pamilya sa Guimaras kun paano mapapauli sa Barangay Poblacion, Nueva Valencia ang ila himata nga napatay sa Pampanga matapos nahulog halin sa ikaduha nga panalgan sang building nga ginatrabahuan.
Natabo ang insidente sang nagligad nga Lunes, Abril 19.
Sa interview sang Bombo Radyo kay Eden Nonifara, iloy sang 24-anyos nga biktima nga si Alias Remrem, iya ginpahayag nga indi na subong makontak ang kumpaniya sang iya nga anak.
Suno kay Nonifara, una nga nagpasalig ang kumpaniya nga sila ang maproseso sa pagpapauli sa bangkay.
Ginapahayag nga P150,000 ang ginapangayo sang punerarya apang P60,000 lang ang ginhatag sang kumpaniya ni Alias Rem-rem.
Nagalain man ang buot sang iloy bangud gindiretso pa nga ginpaidalom sa autopsy examination ang bangkay ni Alias Rem-rem apisar wala pa sang pahanugot halin sa pamilya.
Wala man sang inugbayad ang pamilya sa autopsy exam. Sa subong, nagalaum ang natungdan nga mabuligan sila sang Guimaras Provincial Government sa pinansyal nga kinahanglanon agud madala ang bangkay ni Alias Rem-rem sa probinsya sa ila nga balay.
“Galibog ang ulo ko kun diin ako makuha [sang kwarta].Gapangayo gid ako sang bulig sa provincial government sang Guimaras para mapadala diri ang bangkay sang bata ko. Bisan amo na lang tani ina..nga.. para sa sobra sa isa ka tuig, makit-an ko man ang bata ko. Bisan mahakos ko na lang siya nga isa na ka mayami nga bangkay.”
Nahibaluan nga kapin duha ka tuig na nga nagatrabaho sa Pampanga ang biktima antes natabo ang aksidente.
