ILOILO CITY – Padayon ang contact tracing sa mga naka-angkon sang close contact sa iloy sang isa ka Locally Stranded Individual sa Brgy. Calaparan, Arevalo, Iloilo City nga nagpositibo sa Coronavirus Disease 2019 (COVID-19).
Sa interview sang Bombo Radyo kay Barangay Kagawad Nida Darroca sang nasambit nga lugar, iya ginpahayag nga wala sila sang ihibalo kun ano gid nga petsa nag-abot ang nasambit nga Locally Stranded Individual halin sa Cebu nga nagnegatibo sa Rapid test kag ulihi na lang nakumpirma nga nagpositibo sa RT-PCR test.
Suno kay Darroca, gilayon sila nga nagpatigayon sang emergency meeting sang ila nahibalu-an nga may yara sang isa ka COVID-19 positive sa ila barangay kag ang iloy sang nasambit nga pasyente ang nagpanukot pa sang utang kag ginapahayag nga nakatambong pa sa prayer meeting.
Ginpahayag ni Darroca nga bilang barangay official, indi malikawan nga makabatyag siya sang kahangawa ilabi pa nga ginakabig nga highly populated area ang Brgy. Calaparan.
Gin-athag ni Darroca nga nakahibalo lamang sila nga mga barangay officials nga nagpositibo sa COVID-19 ang Locally Stranded Individual sang ginkuha sang mga tiglawas sang City Health Office sa ila balay.
Bangud sini, ginakabig nga high risk ang iloy sang nasambit nga pasyente bangud nga magkaupod sila sa balay apang gin-athag sang natungdan nga wala nagguwa sa balay ang nasambit nga pasyente kun sa diin sa subong, 16 na ang ginkuhaan sang swab sample para sa COVID-19 test.
