Napadayon pa ang termination procedure sang duha ka police trainees nga nagpahubog samtang nagasuksok pa sang uniporme sa Oton, Iloilo.
Ang duha ka police trainees nga nagpahubog amo sanday Jacob John Ondrada kag John Anthony Lubria, lunsay nagraduate sa Regional Training School sang Marso 2021 kag yara pa sa Field Training Program.
Matandaan nga natabo ang pag-inom-inom sang duha ka pulis sang Hunyo 5, sa diin ginapatuman pa ang liquor ban sa syudad sang Iloilo sa idalom sang Modified Enhanced Community Quarantine (MECQ) status.
Sa interview sang Bombo Radyo kay Iloilo City Police Office (ICPO) Director Police Col. Uldarico Garbanzos, iya ginpahayag nga grave misconduct ang atubangon sang mga pulis sa diin ang penalidad amo ang dismissal from the service.
Suno kay Garbanzos, matapos natabo ang pag-inom-inom sa Oton, Iloilo, natulugan pa ang duha ka pulis sa sulod sang jeep nga ginsakyan.
Nagpangayo naman sang bulig ang driver sang amo nga jeep sa duha ka pulis nga nakit-an niya nga nagapatrolya sa bahin sang Diversion Road, Mandurriao, Iloilo City.
Pahayag ni Garbanzos, didto kag gindala ang duha ka pulis sa Police Regional Office (PRO) VI kag ginreport sa ila nga supervisor.
Gin-ako sang police trainees nga nagpahubog sila samtang nakasuksok pa sang camouflage green nga PNP-Field Service Uniform.
