Ginaduso nga imbestigaran sa Senado ang implementasyon sang subscriber identity module (SIM) Registration Act bangud sang paglapta gihapon sang mga text scam apisar nga halos isa ka tuig na ang nagligad halin sang napasar ang amo nga layi.
Napirmahan ang SIM Registration Act sang Oktubre 2022 sa tuyo nga tapnaon ang mga scams kag padasigon sa otoridad ang pag-imbestigar sa mga krimen nga naangot sa mga cellphone.
May mga kritiko nga nagasiling nga mahimo ini magresulta sa data breach kag paglapas sa privacy sang isa ka tawo.
Sa ginduso ni Senator Grace Poe nga Senate Resolution 745, nakasaad nga madamo sa gihapon nga scam ang gina-text sa mga tawo kag may iban pa nga mobile-related fraud apisar nga nagtakop na ang SIM card registration sang Hulyo 25.
Ginsiling man sini nga nagagamit man ang Philippine Offshore Gaming Operators (POGO) sang SIM cards para sa ila iligal nga mga operasyon.
Suno kay Poe nga amo man ang principal author kag sponsor sang amo nga layi, dapat nga ipaathag sang implementing agencies, telecommunications companies kaw law enforcement agencies kun paano na-rehistro ang SIM cards nga ginpanggamit sa gihapon sa iligal nga mga aktibidad. #
