Nagalaum ang publiko nga gilayon na nga makit-an ang P80 kada kilo ukon mas manubo pa nga presyo sang bombay sa merkado subong nga nag-abot na sa Pilipinas ang suplay nga gin-import sang gobyerno.
Apang suno sa Bureau of Plant and Industry, ang imported nga mga bombay ang wala pa nadiretso sa merkado bangud ginapaidalom pa ini sa inspeksyon sa second border.
Sa National Capital Region, may yara pa sang nagabaligya sang bombay sa presyo nga P200-P300 kada kilo.
Ang rejected nga mga bombay ang masami ginatanyag sa kustomer sa balor nga P250 kada kilo.
May yara man sang nagabaligya sang sliced na nga bombay agud nga makabakal ang mga kustomer sang P10 kada plastic bag.
Matandaan nga ginpahanugutan sang Department of Agriculture ang pag-import sang 21,060 metric tons sang bombay agud nga malab-ot ang demand kag mapasarurot na ang nagapanglaka-ak nga presyo.
Ang licensed importers ang ginhatagan sang tubtub Enero 27 nga petsa agud nga mapa-abot ang shipments diri sa Pilipinas.
Sa kabug-usan nga gin-import, 3,960 metric tons ang fresh yellow onion kag 17,100 metric tons ang fresh red onions.
