Wala sang bisan isa nga traffic investigator ukon local traffic enforcer sa probinsya sang Iloilo nga deputized sa paggamit sang alcohol breath analyzer nga amo ang makabulig-tumod kun nakainom sang makahulubog nga ilimnon ang isa ka driver nga involved sa aksidente.
Ang alcohol breath analyzer amo man kuntani ang mahimo magamit nga ebidensya sa tion nga may pasakaan na sang kaso bangud sa pag-drive apisar nakainom ukon kun yara sa impluwensya sang iligal nga droga.
Sa interview sang Bombo Radyo kay Police Corporal Erwin Magarzo, spokesperson sang Iloilo Police Provincial Office (IPPO), iya ginpahayag nga tubtub subong, wala sang bisan isa nga napasakaan sang kaso sa probinsya may kaangtanan sa paglapas sa “Anti-Drunk and Drugged Driving Act of 2013.”
Mismo ang Land Transportation Office (LTO) Western Visayas ang una man nga nagpahayag nga wala sang napadala nga equipment sa probinsya sang Iloilo.
Suno kay Magarzo, padayon ang pagpakig-angot sang IPPO sa LTO agud nga mahatagan na sini nga equipment ang probinsya kag ma-deputize man ang police personnel sa paggamit sini.
Ang Republic Act (RA) 10586 ukon “Anti-Drunk and Drugged Driving Act of 2013” ang nangin epektibo halin pa sang 2013.
Nakasaad sa sini nga layi nga sa sulod sang apat ka bulan halin sa adlaw sang effectivity, ang LTO kag ang Philippine National Police ang dapat mag-angkon sang “bastante nga breath analyzers” agud gamiton sang law enforcers kag deputized local traffic enforcers sa bilog nga pungsod.
Sa latest nga pagpakig-angot sang Bombo Radyo sa LTO 6, ginpahayag nga may 25 ka alcohol breath analyzer device ang nag-abot sa ila gikan sa LTO Central Office. 11 ang ihatag sa Iloilo City Police Office bangud ini man ang numero sang ICPO personnel nga deputized sa paggamit sini nga device.
