Gindeklarar ang lima ka adlaw nga period of mourning sa Iran kasunod sang hinali nga kamatayon sang presidente sang pungsod nga si Ebrahim Raisi.
Kadungan sini, suspendido man ang tanan nga cultural kag arts activities sa pungsod sa sulod man sang isa ka semana bilang pagpakita sang respeto sa nagtaliwan nga presidente.
Kahapon, Mayo 20, sang ginkumpirma ang kamatayon sang 63-anyos nga lider kag ni Foreign Minister Hossein Amir-Abdollahian bangud sa pagtibusok sang ila ginasakyan nga helicopter sa kabukiran sang north-western Iran bangud sa madamol nga fog.
Pito ka iban pa ang biktima ang ginbawian sang kabuhi sa amo nga helicopter crash.
Nagmandu naman ang chief of staff sang Armed Forces sang Iran nga magpatigayon sang maid-id nga imbestigasyon sa pagtibusok sang helicopter.
Isa ka high-ranking delegation nga pamunuan sang military commander nga may kaupod nga technical experts ang magakadto sa crash site sa Eastern Azerbaijan agud hibaluon sang dugang ang natabo antes ang pagtibusok sang aircraft.
Si Raisi ang ikaduha sa pinakagamhanan nga tawo sa Islamic Republic kasunod kay Supreme Leader Ayatollah Ali Khamenei.
Kasunod sang iya kamatayon, gilayon man nga nagpanumpa si First Vice President Mohammad Mokhber bilang acting president, samtang nagbulos naman ang top negotiator nga si Ali Bagheri Kani bilang acting foreign minister.
Ang pagtaliwan sang presidente ang natabo gid sa tunga sang tensyon sa Middle East. Pila ka semana pa lamang ang nagligad sang nagpalupad ang Iran sang missiles kag drones sa Israel bilang balos sang makamamatay man nga strike sang Israel sa diplomatic compound sang Tehran sa Damascus, Syria.
