ILOILO CITY- Ginlubong na si Iranian President Ebrahim Raisi sa balaan nga syudad sang Mashhad kun sa diin linibo ka mga tawo ang nagtipon sa mga dalanon agud magsaksi sa iya lubong apat ka adlaw matapos ang kamatayon sini bangud sa helicopter crash.
Ang burial ceremony ang gintambungan sang Iranian government kag military officials, kag mga religious personalities.
Nagahaboy sang bulak ang mga tawo sa iya lungon samtang nagalabay ini sa ila.
Gindala ang lungon sa Imam Reza shrine, ang holiest Islamic site sang Iran kag amo man ang lulubngan sang 9th century Imam nga si Ali al-Reza.
Matandaan nga walo ka mga pasahero kag crew ang patay sang nagtibusok ang helicopter sa nabukid nga porsyon malapit sa Azerbaijan border.
Kalakip man sa napatay si Foreign Minister Hossein Amirabdollahian nga ginlubong Shah Abdolazim shrine, isa ka mausoleum kun sa diin ginalubong ang mga kilala nga Iranian politicians kag mga artists.
