Ginkumpirma sang Philippine Coast Guard sa Central Visayas (PCG-7) nga may isa ka lalaki nga pasahero nga napatay kag isa ang missing sang nasunog ang Motorbanca nga Mama Mary Chloe sa bahin sang Barangay Tugas, Candijay, Bohol.
Ang patay amo si Adolfo Ra ola, 53, residente sang Trinidad, Bohol.
Lakip si Ra ola sa 157 ka mga pasahero nga sakay M/V Mama Mary-Cloe sang NNO Shipping nga padulong kuntani sa Bato sa Leyte.
Sa inisyal nga imbestigasyon, naghalin ini sa Ubay, Bohol ‘las onse kahapon sakay ang walo ka mga crew members.
Pagpatak ‘la una sang hapon, sang yara na sa kalalawran sa Tugas kag Tilmobo islands sa Bohol Province, nagpadala ini sang distress signal sa Coast Guard Substation sa Ubay, Bohol.
Suno sa isa sa mga pasahero, samtang nga naka-dock pa lang ang barko sa Port of Ubay, nakit-an na nila nga may aso nga nagaguwa sa engine sang vessel.
Ginpatay ang engine sang makadali, kag sang wala na sang itom nga aso nga nagguwa sang ginpaandar ini liwat, ginpadayon sang crew kag sang shipping company ang pagbyahe.
Ginapatihan nga na-overheat ang engine sang vessel rason sang pagluntad sang sunog.
Samtang yara na sa kalalawran, nag-itom liwat ang aso kag nagdesisyon na ang mga pasahero nga maglulumpat sa vessel suksuk ang ila nga life jackets.
May mga manugpangisda malapit sa area kag gin-rescue sang fast craft ang mga pasahero.
Sa inisyal report sang PCG-7, ginpangdala ang 99 survivors sa Port of Hilongos; 25 sa Tugas Island sa Pres. Carlos P. Garcia town; kag 34 sa Gaus Island.
Ginapatigayon man sang Coast Guard ang search and rescue operations.
Under investigation pa ang rason sang sunog.
