CALINOG, ILOILO – May naistorya na ang Calinog Municipal Police Station nga eyewitness nga ginapahayag amo ang nakakita sa nawong sang isa sa mga suspek nga naghold-up sa Western Union Money Remittance Center sa Poblacion Centro, Calinog, Iloilo.
Natabo ang insidente sang nagligad nga Sabado, Hulyo 10, kag ginapahayag P1.5 million ang nataban nagikan sa amo nga remittance center.
Sa interview sang Bombo Radyo kay Police Captain Dadje de Lima, hepe sang Calinog Municipal Police Station, iya ginpahayag nga handa nga mag-execute sang affidavit ang amo nga eyewitness.
Ginapahayag nga malapit lang sa merkado ang amo nga eyewitness sang nakit-an sini ang suspek nga halin sa establisyemento, nagsakay sa motorsiklo, apang sang nagsuksok ini sang helmet, ginapahayag nga nahulog ang face mask gani nga nakit-an ang iya nga nawong.
Nagsanto man ini sa picture nga ginpakita sang Calinog Municipal Police Station.
Ang amo nga suspek nga wala pa ginhingadlan ang ginapahayag may nga kaso na sang pagpang-hold-up, pagpangawat, kag engagement sa iligal nga droga sa probinsya sang Iloilo ilabi na sa third district.
Nagsanto man ini suno kay Delima sa na-identify sang empleyada sang remittance center nga on duty sang natabo ang hold-up.
Kun madumduman, santo sa panaysayon sini nga empleyada, ginpasimhot siya sang kemikal kag nalipong siya sa sulod sang duha ka oras rason nga ulihi na nakareport sa pulis.
Mata lang sang suspek ang nakit-an sang amo nga empleyada.
Sa subong suno kay Delima, indi anay nila paghingadlan ang amo nga eyewitness para sa seguridad sini.
Wala man ginhingadlan ang suspek bangud subject pa sa verification.
