ILOILO CITY- Liwat nga nagpatigayon sang pagsinapol ang Israeli war cabinet agud diskusyunan ang mga options para sa pagtimalos sa pagpang-atake sang Iran nga lunsay na-intercept man sang depensa kag mga kaalyado sang Israel.
Una na ginpahayag ni Israel Defense Forces Chief of Staff Herzi Halevi nga may yara sang kabaylo ang amo nga atake sang Iran apang wala sang official confirmation kun ano nga sahi sang response ang ginaplano sang Israel.
Sa bahin sang U.S. officials, nagalaum sila nga limitado lamang ang mangin response sang Israel sa Iran.
Para naman sa mga analysts, ila ginasuhenstiyon nga ang isa sa mga pwede ubrahon sang Israel amo ang cyber attacks nga makabig nga lower-level response agud nga mapanubo ang tensyon.
Isa man sa ginalantaw nga lower-level response amo nga i-target ang Iranian facilities ukon proxy groups sa gwa sang Iran.
Para naman kay Rafael Grossi, head sang International Atomic Energy Agency sang United Nations, pila sa mas high-profile targets nga mahimo ubrahon sang Israel amo ang pag-target sa nuclear facilities sang Iran nga madugay naman nga ginakabig nga threat.
Suno naman kay Raz Zimmt sang Institute for National Security Studies, halos imposible nga indi mangin direkta nga target sang Israel ang Iran ilabi na nga direkta man nga gin-target sang Iran ang Israel sang nagligad nga Sabado.
