ILOILO CITY- Patay ang isa ka jeepney driver matapos nga ginluthang sang iya man lang kasilingan sa Barangay Tiring, Cabatuan, Iloilo.
Ang biktima amo si Novie Zanarias samtang ang suspek amo si Marlon Paguidian.
Sa interview sang Bombo Radyo kay Police Captain Dionisio Estacio, hepe sang Cabatuan Municipal Police Station, iya ginpahayag nga base sa ila pagpangusisa, ginhambalan sang suspek ang biktima nga maghalong samtang ginapaatras sini ang iya salakyan apang naakig ang biktima kag didto na sila nagbaisay.
Suno kay Estacio, nagkuha ang biktima sang screwdriver kag ginhanaan ang suspek samtang gilayon naman nga nagkuha sang pusil ang suspek sa ila tiangge kag didto na gintiro ang biktima nga naigo sa ulo nga gintunaan sang iya kamatayon.
Gintuyo pa sang suspek nga magpalagyo apang naabtan ini sang kapulisan kag natigayon nga madakpan.
Narekober sa iya ang 38 caliber revolver nga amo ang gin-gamit sa krimen.
