Kanselado ang hearing subong nga adlaw kag ma-delay na naman ang proseso sa nabilin nga pending nga kaso ni former Senator Leila de Lima matapos nga nag-desisyon ang isa pa ka judge nga mag-inhibit.
Si Presiding Judge Abraham Joseph Alcantara sang Muntinlupa City Regional Trial Court Branch 204 amo ang ikaduha nga judge sa sulod lamang sang isa ka bulan nga nag-inhibit sa sini nga kaso sa iligal nga droga.
Kun may inhibition, buot silingon, maga-untat si Alcantara sa pag-uyat sa nasambitan nga kaso.
Gin-anunsyo sini ang amo nga desisyon sa pareho nga adlaw nga ginsapubliko man ang motion to inhibit nga gin-file sang Department of Justice prosecutors.
Sa amo nga motion, ginsaad sang prosecutors nga nagakahangawa sila nga maapektuhan ang desisyon ni Alcantara bangud siya anay ang nag-acquit kay De Lima sa iya ikaduha nga kaso. Sabat naman ni Alcantara, i-grant niya ang Motion for Voluntary Inhibition indi bangud matuod ang ginakahangaw-an sang prosecution kundi bangud indi niya luyag nga kwestyunon ang iya nga kredibilidad, integridad, kag pagka-patas bilang judge.
Bangud sa sini nga hitabo, i-raffle liwat ang amo nga kaso. Madugayan ini nga proseso lakip na ang pagsaylo sang mga nagakaigu nga dokumento halin sa amo nga judge pakadto sa lain naman nga judge.
Nahibaluan nga sang Hunyo 15, nag-inhibit man si Branch 256 Judge Romeo Buenaventura sa amo man nga kaso ni De Lima bangud sa ginpahayag nga conflict of interest.
Naka-detain si De Lima sa Philippine National Police Custodial Center sa Camp Crame, Quezon City halin sang Pebrero 2017. Duha sa iya tatlo ka kaso ang na-dismiss na apang nagapabilin ini sa presuhan bangud ginbasura ni Judge Buenaventura ang iya nga petition to bail sa iya nabilin nga drug charge sang nagligad nga bulan. #
