Nagalaom si former Banat Party-list Representative Salvador ‘Buddy’ Britanico nga mahatagan na gid man sang hustisya ang pagpatay sa iya anak nga isa sa mga biktima sang extrajudicial killings sa idalom sang Duterte administration.
Ang iya anak amo si Delfin Britanico, isa ka negosyante nga ginluthang-patay sa Iloilo River Boulevard sa Bgy. Nabitasan, La Paz, Iloilo City sang Enero 19, 2020.
Sa interview sang Bombo Radyo kay former Representative Britanico, iya ginpahayag ang pag-aresto kay anay presidente Rodrigo Duterte agud mag-atubang sa International Criminal Court bangud sa ginaalegar crime against humanity ang panugod sang pag-angkon sang hustisya para sa tanan nga biktima.
Apang suno kay Britanico, sa iya nga bahin, mas maayo kun masilutan gid ang mga katapo sang kapulisan nga nangamot kag may papel man sa pagpatay sa iya anak.
Matandaan nga isa ka ranking police officer kag lima ka iban pa nga pulis ang naangot sa kamatayon sang negosyante.
Ini amo sanday Colonel Martin Defensor nga director sang Iloilo City Police Office sang amo nga tion, Police Corporal Joseph Andrew Joven, Master Sergeant Vernie Escorial, Staff Sergeant Michael De Felipe, Staff Sergeant Ricardo Morante,kag Staff Sergeant Freddie Libo-on.
Si Joven ang nagserbe driver sang Mitsubishi Adventure nga gingamit sa pagpatay kay Delfin, si Morante ang gintudlo nga nagtiro, kag ang nag-finishing shot amo si Escorial.
Si Defensor naman ang gin-akusahan nga “Accessory to a Crime” bangud sa pagdepensa kag pag-apin sa iya mga tinawo.
