Posible nga wala na sa hurisdiksyon sang Czech Republic si anay Ako Bicol party-list Rep. Zaldy Co.
Suno ini kay Justice Secretary Frederick Vida nga nagkadto mismo sa Prague.
Suno pa kay Vida, wala sang garantiya ang Pilipinas nga magapabilin si Co sa hurisdiksyon sang Czech Republic kag may possibilidad nga nakaguwa na ini sa nasambit nga pungsod.
Suno pa kay Vida nga ginaplano pa ang mga meeting upod sa mga opisyal sang Czech, kaupod ang Ministry of Justice, agud beripikahon ang impormasyon sang mga otoridad sang Pilipinas nahanungod sa pag-detain kay Co kag agud mahibaluan kon paano ini magapauli sa Pilipinas.
Dugang pa sini nga respetuhon sang Pilipinas ang proseso sang Czech Republic kag sang European Union sa pagdumala sang kaso.
Ginkumpirmar man niya nga wala pa sang ginpagwa nga Interpol red notice batok kay Co.
Ginpahayag man sini nga may mga dugang nga mga dokumento ang isa ka team agud suportahan ang aplikasyon para sa red notice.
Nahibaluan nga una na nga ginklaro ni Justice spokesperson Polo Martinez nga wala gin-aresto sang Czech authorities si Co, apang gin-restrain lamang ang iya liberty ukon kahilwayan bangud sang possible violation sang immigration regulations.
Agud mas mahangpan pa gid sang publiko, ginpaanggid niya ini sa sitwasyon sa airport kun sa diin may tawo nga nag-abot apang wala ginpasulod sang immigration.
Indi ini technically arrested, apang may “deprivation of liberty.”
Nanindugan naman ang Malacañang paagi kay Palace Press Officer Undersecretary Atty. Claire Castro nga wala man naggamit si President Ferdinand Marcos Jr. sang termino nga “arrest” sang gin-anunsyo sini ang detention kay Co sa Prague sadtong Abril 16.
