GUIMARAS – Gin-ako sang Provincial Government sang Guimaras nga nabudlayan sila nga atubangon ang pagpamahog sang kaso sang Coronavirus Disease 2019.
Sa interview sang Bombo Radyo kay Guimaras Governor Samuel Gumarin, ini ang ang ikalabing-una nga tion nga maka-engkwentro sila sang kaangay nga problema.
Suno kay Gumarin, kung siya ang pamangkuton, yara palang sa 56%-60% ang kahandaan sang probinsya sang Guimaras sa pagbato sa COVID-19
Sa pihak sini, nagpasalig ang gobernador nga may yara na sila sang pila ka mga initiatibo agud makudalan ang probinsya sang Guimaras batok sa makamamatay nga balatian.
Isa na diri ang pagpaiway sa paghiwat sang Manggahan Festival sa baylo nga italana nalang ang pondo sang nasambit nga kahiwatan para sa mga preparasyon sang probinsya sa pagpatigayon sang mga preventive measures.
Samtang may kaangtanan naman sa mga religious activities, maga sapol pa ang gobernador sa opisyales sang simbahan kaupod man ang Sangguniang Panlalawigan agud diskusyunan kun bala padayunon pa ang paghiwat sang Taltal sa Guimaras bangud ginalauman nga dugukon naman ini sang tuman ka damo nga mga tawo.
Sa screening naman sang mga naga gwa kag sulod sa probinsya, sa bahin sang wharf sa Bo. Obrero, sa bahin sang PPA kag ang banwa sang Jordan kag Buenavista ang may yara sang kaugalingon nga screening. Na prefer nga diri sa siyudad mapatigayon sang screening bangod mostly sang mga pumuluyo ang diri naga trabaho kag naga eskwela.
Nagpanugyan ang gobernador sa mga pumuluyo nga wala sang nagakadapat nga ikabalaka kag indi magpanic sa baylo nga magkooperar bangud ginahimo nila ang tanan agud maprotektahan ang tanan batok sa COVID-19.
Sa subong, may yara palang sang isa ka Persons under Investigation sa Guimaras nga isa ka 76-anyos nga nagikan sa Italy kag nakitaan sang sintomas sang COVID-19.
