CARLES – Madamo sang ginalantaw nga malain nga epekto ang banwa sang Carles, Iloilo matapos nga wala nadala sa Official List of Passers sa 2019 Good Financial Housekeeping nga ginpagwa sang Department of the Interior and Local Government (DILG).
Sa interview sang Bombo Radyo kay Mayor Siegfredo Betita, iya ginpahayag nga una gid ang ‘huya’ bangud sa 42 ka kabanwahan sa probinsya sang Iloilo, 38 ang nadala kag isa sila sa apat ka banwa nga wala nakapasar.
Wala man nakapasar ang banwa sang Barotac Nuevo, Barotac Viejo, kag New Lucena.
Ikaduha suno kay Betita, posible nga indi na sila maka-loan ukon makautang bangud daw kaangay nga ginpakita sini nga indi maayo ang financial management sang banwa.
Ikatatlo suno sa alkalde, mahimo nga may iban pa nga restrictions ang DILG kag ini ang iya pa nga buot hibaluon.
Ginpahayag man ni Betita nga ini ang una nga kahigayunan nga wala nadala ang banwa sang Carles sa Seal of Good Financial Housekeeping.
Gin-ako sang opisyal nga wala gid niya natutukan ang pagpasa sang report sang ila financial transactions bangud bilang alkalde, madamo siya sang ginahikot kag nagsalig siya nga may ara sang department head nga amo kuntani ang nagpamuno sa pagpasa sang mga requirements.
Sa inisyal nga report sa iya, na-delay lang ang pagsumite sang ila report kag ginalantaw man nga posible may ara sang sablag sa in-charge sang ila management information system.
Suno kay Betita, pa-imbestigaran niya ang kabangdanan sang delay kun makabalik na siya sa Carles kag iya man sapulon ang iban nga mga opisyal.
Nahibaluan nga ang Seal of Good Financial Housekeeping ang isa ka pamatuod nga nadumala sang mga local government unit ang ila financial affairs santo sa parametro sang DILG.
Nahibaluan nga kun wala nalab-ot ang parametro, indi makakuha sang Seal of Good Financial Housekeeping ang isa ka munisipalidad nga amo man ang isa sa mga importante nga requirement para makakuha sang Seal of Good Local Governance.
