ILOILO CITY – Gin-ako sang opisyal sang Brgy. Mohon, Arevalo, Iloilo City nga kulang ang police visibility sa ila nga lugar rason nga natabo ang pagpangluthang sa isa ka collector sa Mohon Terminal sang damlag lang.
Sa interview sang Bombo Radyo kay Punong Barangay Rico Acap, iya ginpahayag nga madamo na nga bes nga may nagluntad nga krimen sa ila nga lugar kasubong sang pagpang hold-up bangud wala sang presensya sang pulis sa ila nga barangay.
Suno kay Acap, matuod nga may yara sang Compact Station sa ila lugar apang wala ini sang may naga duty nga police officer.
Ginpahayag ni Acap nga ginahimo man sang mga Barangay Official ang ila katungdanan paagi sa pagronda sa gab-i apang lain gid kun may yara sang presensya sang pulis ilabi na nga madamo sang tawo sa terminal.
Naghingyo si Acap sa Arevalo PNP nga kun tani, may yara sang police visibility sa ila lugar agud nga indi na masulit pa ang kasubong nga krimen.
