ILOILO CITY – Nagpaathag ang construction company nga nagakaayo sang Forbes Bridge ukon ang taytay nga napatung-an sang Luna Street, La Paz kag Brgy. Danao, Iloilo City.
Sa interview sang Bombo Radyo kay George Palma, foreman sang Gordon construction, iya ginpahayag nga lakip sa mga rason sa atrasado nga pagkaayo sang taytay amo ang kakulang sa tyempo.
Ini bangud nga sa tion sang kagab-ihon sila naga-umpisa sang pagkaayo kag indi sa aga.
Suno kay Palma, ginalikawan nila nga may maigu nga mga salakyan kag mga tawo kun aga rason nga kada ‘las otso sang gabi tubtub ‘las tres sang kaagahon sila naga-trabaho.
Sa subong wala pa naubos bakbak ang iban nga bahin sang taytay.
Sa tion nga maubos na kuha ang mga debris, umpisahan na ang pagbutang sang kabilya, pagbuhos sang semento kag pag aspalto.
Nagpangayo man si Palma sang paghangop sa publiko sa huol nga ila natuga.
