ILOILO CITY- Labi pa nga nagbaskog sa kamara ang panawagan kay Presidente Ferdinand Marcos Jr. nga i-ban ang Philippine Offshore Gaming Operations (POGO) sa pungsod sa tunga sang reports sang mga krimen nga naangot sa amo nga negosyo.
Ini nga panawagan ang ginhimo ni ACT Teachers Party List Representative France Castro kadungan sang pag-file sang Makabayan bloc sang House Bill 10525 nga nagaduso nga dumilian kag i-criminalize ang offshore gaming operations sa Pilipinas.
Ginaproponer man sini nga i-revoke ang mga lisensya nga ginhatag sa POGOs.
Suportado naman ni Surigao del Norte 2nd District Representative Robert Ace Barbers ang panawagan kag gin-apelar sa President nga pamatian ini.
Pahayag niya, gina-ban ang POGOs sa China, apang diri sa Pilipinas, padayon sila nga ginahatagan sang lugar agud mag- operate kag ang malala pa, ginagamit ini sang criminal syndicates bilang fronts para sa ila iligal nga mga aktibidad.
Suno naman kay House Committee on Ways and Means Chairperson kag Albay 2nd District Representative Joey Salceda, sa iya nga bahin, pabor ini sa pag-phase out sang iya gintawag nga mga “bad and mediocre” POGOs kag indi ang bilog nga industriya.
Gindayaw naman ni Salceda ang pagtinguha sang Philippine Amusement and Gaming Corporation (PAGCOR) sa pag- improve sang law enforcement kag revenue collection efforts sa offshore gaming licensees (OGLs) ukon mas kilala nga POGOs.
Base sa data nga ginauyatan sang opisina ni Salceda nga nakuha gikan sa PAGCOR, nagapakita nga ang 2023 PAGCOR collections halin sa POGO ang nagtaas sang P5.1 billion halin sa 87 licensees, kun ipaanggid sa P2.99 billion gikan sa 158 licensees sang 2022.
