776 ka mga katapo sang Barangay Health Emergency Response Teams (BHERTs) sa syudad sang Iloilo ang nabakunahan batok sa COVID-19 kahapon, Abril 20.
Ini ang ginalakipan sang pila ka punong barangay, mga barangay kagawad nga nagapamuno sa Committee on Health, health workers, kag pila ka Sangguniang Kabataan (SK) officials.
Ang gingamit nga bakuna ang kabahin pa sang 1,900 ka available nga Sinovac COVID-19 vaccines nga gintugyan sang Department of Health sa Iloilo City Government.
Una na nga ginpahayag ni Mayor Jerry Treñas nga sa 1,900 ka doses, 1000 diri ang para sa health frontliners, 450 para sa mga senior citizens, kag 450 para sa mga immunocompromised individuals.
Sa interview sang Bombo Radyo kay Mr. Jeck Conlu, COVID-19 spokesperson sang syudad, iya ginpahayag nga subong nga adlaw, Abril 21, umpisahan naman ang pagbakuna sa immunocompromised individuals kag senior citizens.
Unahon sa vaccination ang mga nakauna man nga nagparegister sa ila nga barangay.
Sa Byernes, Abril 23, ang schedule sang iban pa nga mga punong barangay.
Kulang ang 1,900 doses para sa first dose suno kay Conlu apang padayunon ang pagbakuna sa masunod nga semana bangud nagpasalig man ang national government nga may parte ang Iloilo City sa maabot nga Sinovac coronavirus vaccines sa Pilipinas.
