Magapatigayon sang parallel investigation ang Criminal Investigation and Detection Group (CIDG) Region VI may kaangtanan sa pagluthang-patay sa pinuno sang Health and Sanitation Division sa Iloilo Fish Port Complex.
Ang biktima amo si Glen Peremne, 42 anyos, residente sang Barangay Calaparan, Arevalo, Iloilo City, anay katapo sang Bureau of Fire Protection (BFP) kag utod ni the late Jail Senior Supt. Gilbert Peremne, ang assistant regional director sang Bureau of Jail Management and Penology (BJMP) Region 6 nga napatay man bangud sa cardiac arrest.
Sa interview sang Bombo Radyo kay Police Major Jess Baylon, pinuno sang CIDG Region VI, iya ginpahayag nga ini ang kasunod sang paghingyo sang Philippine Fisheries Development Authority kay Philippine National Police (PNP) Chief Police General Guillermo Lorenzo Eleazar nga mas padalman kag imbestigaran sang maid-id ang motibo sa likod sang pagluthang-patay Peremne.
Suno kay Baylon, diri kag ginmanduan sila sang national CIDG nga magpatigayon sang thorough investigation.
Gin-athag ni Baylon nga indi sila magkapot sang kaso kundi magapatigayon lang sang series of information gathering kadungan man sang nagapadayon nga imbestigasyon sang Philippine National Police.
Ginpahayag niya nga imbestigaran man nila ang mga empleyado sang Administrative, kag Security Division sang Iloilo Fish Port Complex agud makatipon sang dugang nga mga impormasyon.
Dugang pa ni Baylon, tinguhaan nila nga matul-id ang gin-ugatan sang natabo kay Peremne kag kun ano pa gid ang mga isyu kag concern sa sulod sang Iloilo Fish Port Complex.
PANAWAGAN SANG HUSTISYA
Samtang, padayon naman nga nagapanawagan sang hustisya ang Iloilo Fish Port Complex sa pagkamatay sang ila empleyado.
Sa interview sang Bombo Radyo kay Dr. Justo Anaquita, spokesperson sang Iloilo Fish Port Complex, iya ginapahayag nga ini ang rason kun ngaa nahisugtan sang ila pamunuan nga magpadala sang request sa PNP chief agud mahatagan sang dugang nga development ang kaso sang biktima nga si Glen Peremne.
Suno kay Anaquita, ila ginkalipay nga nakahanda ang CIDG nga mas pasangkaron pa ang imbestigasyon sa kaso ni Peremne.
Pahayag niya, wala sa gihapon update ang imbestigasyon sang mga pulis rason nga nagakadapat aktuhan man ini sang CIDG.
Sa pihak nga bahin, wala naman nakabaton sang instruction nagikan sa National PNP ang Police Regional Office (PRO) VI may kaangtanan sa pagsulod sang CIDG Region VI sa imbestigasyon sang kaso ni Glen Peremne.
Sa interview sang Bombo Radyo kay Police Brigadier Gen. Rolando Miranda, director sang PRO VI, iya ginpahayag nga wala pa sila sang ihibalo may kaangtanan sa pag-imbestiga sang CIDG sa kaso ni Peremne.
Apang kun matigayon, wala man sila sang may nakita nga isyu diri.
Suno kay Miranda, mas maayo kun maga-imbestiga man ang CIDG kaupod ang PNP agud nga mas matul-id ang matuod nga natabo sa biktima.
Samtang, ginpat-od sang Molo Police Station nga nakahanda man sila nga maghatag sang impormasyon sa CIDG may kaangtanan sa kaso ni Peremne.
Sa interview sang Bombo Radyo kay Police Major Marlyn Roquero, hepe sang Molo Police Station, iya ginpahayag nga wala pa sila sang may nabaton nga impormasyon kun i-take over sang CIDG ang kaso ni Peremne.
Suno kay Roquero, kun luyag sang pamilya ni Peremne nga ang CIDG na lamang ang maga-imbestiga sang kaso sang ila himata, wala man sila sang may nakita nga problema diri.
Ginpahayag sang pulis nga sa tion nga kinahanglan man makig-angot sa ila sang CIDG may kaangtanan sa imbestigasyon sang kaso ni Peremne, handa man sila magcoordinate.
