Gin-deny sang Korte Suprema ang petisyon para sa temporary restraining order ukon TRO nga nagatuyo punggan ang Senado kag ang Blue Ribbon Committee sa posible pagbag-o, pagtago ukon pag-revise sang tanan nga bersyon sang draft committee report may kaangtanan sa imbestigasyon sang kontrobersyal nga flood control projects.
Sa resolusyon sang SC en banc nga may petsa Abril 29, 2026, ginbasura ang petisyonsng mga abogado nga nagapangayo sang mandamus kag certiorari agud mapreserbar ang draft report.
Nagmando man ang Korte Suprema sa mga respondent nga sanday Ping Lacson, Migz Zubiri, JV Ejercito, Sherwin Gatchalian kag sa Senate President nga magsumiter sang ila komento sa sulod sang 15 ka adlaw pagkatapos mabaton ang notice sang resolusyon.
Sa subong, bakante ang tanan nga committee chairmanships kag memberships sa Senado matapos ang leadership coup sang Lunes nga nagbutang kay Alan Peter Cayetano bilang bag-o nga Senate President.
Antes sang pag-ilis sang liderato, si Lacson ang chairman sang Blue Ribbon Committee kag ang nagpanguna may kaangtanan sa ginapahayag nga anomalya sa flood control projects.
Base sa report wala pa na-file kag na-presentar sa plenaryo ang partial flood control report apisar pirmado na ini sang pito ka senador.
Samtang, ginbawi naman nila Zubiri, Ejercito kag Gatchalian ang ila mga pirma sa draft report.
Nauna nga nagpahayag si Lacson nga ang posible nga pagrekomendar sang report ang makapasaka sang kaso kriminal kag administratibo batok sa pila ka mga senador kag anay mga mamalidha nga nalakip sa imbestigasyon sang maanomalya nga flood control projects.
Lakip sa ginhingadlan sanday Chiz Escudero, Joel Villanueva, Jinggoy Estrada, anay Senador Bong Revilla, anay Ako Bicol Party-list Rep. Zaldy Co kag anay Caloocan Rep. Mitch Cajayon-Uy.
